A chuakmi nak in a rak lutmi an tam deuh.
Mino, ngakchia, pitar, putar, tlangval, nungak...
Zoh ah thilrit phormi bang mithmai panhlo lawng tein..
Nichuah kaa in ka tthu i ni a thla, khua a mui thluahmah cang.
Coffee kaa hunhmi nih a ka dih tak cang i , Coke nih ka khua a ka sih ter chin.
Dothnihnak in thlalaawngka pawng ah ka tthu i inn tang i Emergency Entrance lei ah a kal chuahmahmi pawl khi ka hei hmuh khawh hna.
Ka hmaikaa i an piahmi movie hi voi zeizahnak an thlen dik a si cang. Khuaza za ruat buin TV hmai ah a tthumi cu keimah he minung pahra hrawng kan si men lai.
Rel awk kaa putmi cauk pawl zong an dih cang i ka pawttam hram zong aa thawk cang. Si le khai haw namnak ah zeihmenh ei ka or a chuak lo. Hngah timi a rak fawilo ning hi!!
Caan liam tel fawi deuh in ruat kho ning ka ti i ka phone in Netflix ka kau. Zohsianlo in kaa chiah ka timi Gossip Girl ka zoh. Dinh loin 6 episodes ka lim i nazi ka zoh cun 12am tling deng cang.
Tuahawk hngal loin khua ka ruat. Kaa kenmi notebook ka chuah i ballpen ka tlaih buin lenglei ka hei cuan. Elektrik dah tang ah a chawkletmi an um len rih. Thingkung tang ah biaruah pah in kuak zumi zong an um. An chungkhar pakhat khat an hngak ttheo men lai.
Van ah arfi an chuak lo i thlapa zong ka hmu lo. Ka umnak in a langh lo ma si..thlapa chuah lo zaan tu dik a si. Hla ngaih ka lung ah a chuak. Pandora ka on i Jason Derulo sakmi "What If" timi hla a ra.
"But we can't....
We can't tell the future "No!"
But that's just the beauty of the World we know..
Baby...what if...."
What if----
What if-----
What if-------
Vawilei cung hin zawtfahnak hi rak um hlahseh law...
Ziah..Pathian nih akan dawttuk a si ah cun zawtfahnak hi a kan in ter hnga?
Hngakchiano tete zong zawtfahnak tuar buin an nunnak a liam hnga siah cun zeiruang dah arak chuahter duh len hna hnga?
Vawilei cung ah zawtnak timi um loin kum sawmkua OR kumzakhat tlin le cang kaa thih rak siseh law ttha deuh hnga lo ma? Sibawi te zong kan herh hna hnga lo i insurance kong ah lungrawh awk zong um hnga lo.
Second Vanram an timi US pi ah hitluk in zawtfah ruang ah harnak a tongmi an tam ah hin cun, vawilei cung ramniamnak hmun i a ummi hna ca khin cun----
Nunnak hi tangka in ser khawh a si ma? Tangka lo tu cun nunnak liam a fawi tuk!
Caan hi kum hnga hrawng in khirh tthan ngah sehlaw ....
Sibawi si ka duh ko!
