Semester pakhat cu a dih tthan cang!
A rauh hlan ah Spring Semester phan lai!
Caan liam afawi ning hi. Rianttuan pah le sianginn kai pah hrim cun ni le caan an liam theih manh a si lo.
Kawlram ka um lio cun nikhat chung ah inn pi i kan tarmi nazi khi voihnih hlei in ka zoh bal lo. Zingkaa sianginn kal lai le zaan ih caan phanh lai lawng ah ka zoh tawn. US ka phak hnu cun nikhat chung ah nazi voi zeizat ka zoh ka rel cawk lai lo.
Zeipi pa tuah ttung lo zong ah caan ka zaa kho lo. "Na kut bilmi na samh hlan hmenh ah zeithil cang lai na thei kho lo" an ti tawn nain a ra laimi cann ah zei zei pawl ka tuah lai ti hi ka ruah cia peng hna. Tuah khawh tak le khawh lo tu cu! Hmm..a ka lem cang rua.
Sianginn khar a si nain ka ba tthiam ko. Kai pah nak in ka ba deuh rua dah ka ti. Good student ka si lo tuk ning hi a mak. Nain, khuaruahhar cu a si ve..sianginn campus chung um ka nuam tuk. Cazah lo ruang ah ho sayamah te hmenh nih fung in tuk le hrocar um lo cu a nuam khun :) class kai hramthawk lio i active tuk ning le alaifang hrawng phanh ah thathut in vun i lak a dongh lei sang cun zei study hmenh zuam ti lo..final exam ni phanh tak tik i molh deng dihlak in cazoh khi....rim hlei loin semester tam ngai sin ah ka liam peng rih.
Xmas phan lai i New Year si cang lai. New Year resolution kong a tuakmi le aceih lenmi an tam. Hlan kum pawl cun ka rak i ruah len ve nain zei ka hlei lo. Lungdongh ka thiam lo i a si. Keimah le keimah hi lungdongh awk ngai ka si nian.
Y2K kan rak ttih tuk ning kha ka ruah tthan ah ka nih chuak ngai. Zeiruang ah hen sikha? Fiang in ka thei ti lo. Keimah ning ka si rih ko 2012 hmenh liam cang lai hi...kum hi dawi khawh ma na duh deuh, khrih tthan khawh dah ka ti hna seh law cu..ummm kum sin ah kal tti ka duh ko. Ka no lio tluk in what if sentence hi ka uar lem ti lo :D
2013 kan phan kho tak hnga ma? an ti. Tukum December thla chung cu biakinn a kal khunmi zong an um lai dah. Azia a tthat ter khunmi zong an um lai. Hoi hmuh lai ttih ah thli tein thla a cam sekmi zong an um ttheo lai. Siang huaha lo bu tein hawidang a bawmmi zong an um hrim lai. Aruang cu Dec 21 caan dongh ni ah Vanram phanh lai lo ttih ruang ah hen ta...mah ni cu Friday a si lai i kei cu chunni tlak rian ka ttuan lai. Busy day si lai i caan dongh kong zong ruah caan ka ngei lai lo dah!
I titer hi ka rem lo tuk cang. "cang" ka ti duhnak cu keimah hrim ti ter ka rak hmang tuk bal.(past tense:)
Lenglei zohnak in mi kan chawnhbiak hna ning hi ka khuaruah a har. Aho a si theih lomi zong athli puan hruk aih mi kan hmuh nak in kan chawnh hna ning a dang. Nu hrim hi kan zual. Dawr ka ttuannak ah ka hawi le nih a rak ei mi kan customers pawl an chawh hna dan hrim nih hin ka khuaruah a ka har ter ngai tawn. LV bag le Chanel bag a beimi an chawnh hna dan le brand ngeilo thilpuan a hrukmi an chawnh hna ning a dan khawh ning hi!
Naizarh ka off ni ah kan dawr ah homeless pa arak ra. Leng ah a kik pah i dawr chung a rak luh bia khi a si. Rawl ei nak ca tangka cu a ngei lo. Kan boss nu nih dawr chung ah um ter a duh lo caah buh le soup a pek i a kal ter. Athaizing ah arak ra tthan. Kan boss nu a um lo lio caan a si i ka hawinu nih aw nem tein kan dawr ah rat lo ding a chimh. Ruah lo pi khin kan mit aa tong i ka hei nih..a ka nih ve i "Happy holidays" a ka ti.
Mah tiang ah homeless pa a si ka thei lo. Tlawmpal ah a tho i kan dawr in a chuak. Ka hawi le cu an zai len. "Pek a hau lomi..kan boss nu ruang ah a si. Mah ti ei awk kan pek leng mang ah a ra peng ko lai hen cu."
Mah lawng ah ka fiang. Dawr leng ah ka chuak i ka kawl. Lamhlat aphan rih lo. Ka auh i tangkaa tlawmpal te ka pek. " Stay warm and take care Sir!" ka ti i "Thank you so much and God bless you kid!" a ka ti. Dawr chung ah ka lut zok tthan. Ka hawi le cu dong lo in an zai len rih ko. Leng ka chuah an ka hmuh le hmuh lo ka thei lo..ka ngeih chunh te chung in ka pek mi cu ka nawl a si ko nain, hmailei ah buaibainak bal chuak hram hlah seh ka ti. Homeless pa nih khan namte maw, meithal ma zong rak i ken seh law leng i ka va kawl, hal lomi tangkaa ka ve pek ah khan a duh in rak ka tuah sehlaw cu tiah chikhat cu khua ka hei ruat tthan. Thatlonak thil tu a cang sual lai tiah ttih buin pawngkam bawmh ngamnak thazang ngeih lo cun zeitin dah kan vawilei pi hi a better place ah kan ser hnga?
"Cu ngai te cu ah Dingdi Mang!" nan ka ti ma?
Thawl awk ttha loin zaankhat ah a rak ra tthan. Kan boss nu um lio a si i ka hawi le dang nih an chawn duh lo. Beer langkhat a tleih buin a tthu ko. Keimah table a si lo nian thimawk ka ngei lo. Ho nih an take care duh lomi cu. Hawidang ka zohkhenh ning tein ka zohkhenh ko. $20 ka ngei.Mah hin zeidah ei awk ka cawk khawhmi a um a ka ti i fried rice le fried chicken ka cah piak. Aman zong a fawi i a paw zong khimh hnga ka ti. Ka kut a ka tlaih i "Again kid, God Bless You!" a ka ti. Coka in ka hawile nih phone in hmanthlak an rak ka timh. An rak kan zoh i an ni len. Ka lung fiang lo ngai!
Ka ruahchanmi zeitak hmenh a um lo. Asi khawh cun man lak loin ei ter ka duh nain kan boss nu nih a cahmi vial te a man na pek ter colh lai tiah a ka ti. Man pek loin a tli lai tima a phan hnga zeidik. Fried rice le chicken man cu $13.95 a si i check ka hei pek. Azoh i "yah beer ka din mi man na ka charge ttung lo, na philh rua" a ti i check cu a ka pek tthan. Ka upat tuk! Ka zangfak fawn nain charge lo cun boss nih a ka sik lai ka ti i ka charge. Total ah $18 hrawng a si. $2 lawng a caah a tang cang lai. Ka lung a tthat lo ning hi.
Athli tein coka ah soup le rice ka lak in ka fun piak. Apaw ttam tik ei awk ah. Ka pek i "ka busy tuk i duh sah tein ei law na duhmi um cun ka hal te" ka ti i ka kal tak. Tuah awk tam tuk ka ngei i ka tli le len. Ka ba ngai..zeidah a lawh hnga tiah mi pa a tthutnak ka zoh ah cun a rak um ti lo. A ei nak table cung ka zoh..ka funhmi rawl a philh sual hnga ma tiah. Philh lo tein aa kal pi ko..cun, $2 table cung ah aka chiah tak.
KA lungchung tein "ziah na ka chiah tak duh ee..na ngeih hnihchunh te naa fim ko lo" ka ti. Ka pawng ah um rih sehlaw cu a tangkaa $2 te hi ka pek chih tthan hnga nain. Ka lak i tip kan chiah nak box chung ah ka rawn. Tuzan kan rian dih in cheukhat nih tips an rel lai i kan hmuhmi tangkaa kan i cheu hna lai. Homeless pa nih a kan chiah takmi $2 te zong cu chung ah cun a tel ve lai cu.
Thla kan cam piak, "May God be with you!"
