Dingdi
Pu G.Biak Nawl
Dingdi timi hi thingkep phun khat a si i, paar dawh a paarmi a si caah, minthang paar dawh a si. Micheu nih bingbir he an palh tawn hna i, tlaangphong paar dingdi tiah palh in a chimmi zong an tam ve. Cuti kan ti tikah, kanmah le tiram hoih in thil min sak aa dang ciomi kan si caah, bingbir zong cu dingdi a timi an um kho tak ko. Dingdi cu thingkep paohpaoh hi an si dih ko, a timi zong an um tthiamtthiam. Zeiti a va si paoh ah, dingdi timi cu thingkep phunkhat a si, ti hi cu al awk a um lo.
Dingdi timi biafang zei sullam dah a ngei ti hi hngalh a duhmi nih an ka hal ttheo. "Ding" timi cu hluaimim thingkung caam pipi khi a si i, "di" timi cu a dong, a paarlei, a ziik tinak a si. Cucaah dingdi timi cu thinghluai mim saang paar ah a ummi tinak a si ko. Dingdi paar cu thingkep dang nakin a ziamh a har. Thla khat chung a paar a ziam (a ttil) lo. Cucaah, ngaknu [:)].
Dingdi cu a hramthlaak an sau, an puam i, a kung le a hnah a a hak nawmmi an si. Paar muici a ngeihmi cu, a dum, a sen le a raang nawn ttial dip ti bantukin a phunphun an um. A sen phun cu May le June ah an paar i, a dum phun cu October ah an paar. A rang nawn ttial dip phun cu April le May ah a paarmi an tam. A sen phun hi, micheu nih dingdi-senri an ti ve i, a sulllam cu dingdi sen phun tinak a si ko.
Hi ruangah hin, micheu nih senri le dingdi hi an palh tawn hna. Senri timi cu thingkep phunkhat, paar dawh minthang a si ve i, a hraamthlak a ttiak. A paar hi a kung in an momh colh i a kung cu an zual dih. A paar aa samh dih tikah cun, a kung lang loin, a bor khan khin an paar. Senri cu muici dang a ngei lo, a sen phun lawng a si ko. Senri ti sullam cu sen ziziaite in mithlaang a si, tinak khi a si.
Thingkep hi phun tam taktak an um i, anmah le phun hoih cio in phun min peek an si. A tlaangpi in Fringed Orchid le Showy Orchid tiah an tthen hna i, dingdi hi showy orchid phun chung um cattlelaya paar laivuang pawl phun a si ve. A hnah karlak kip khin a ko, a ngiang tete an chuak i, cu a ngiang ah cun a paar tete cu a bor in an paar. Cucaah, senri he cun an sining hrim an i lo lo. Dingdi sen phun kha senri ah a cheu nih an ruah caah palhnak a um hi a si.
