Kan ziaza hi chikhat cu kan thuh khawh. Hawi he kan um tti caan le inn i kan um caan kan zia aa dang. Sianginn i kan zia le rian i kan zia zong a lo lo. Kan phanhnak kip ah kan ziaza kan thlen i atak a simi kan zia hi kan thuh tawn. Kan i fim ter chel, kan i uah chel, toi kan i dor ter chel, duhnung tukmi te kan i lawh ter caan le kan mah kan sining tak lo piin kan um caan hi a tam tuk. Kan mah le kan mah kan i hlen a si i a donghnak ah cun kan mah lila hmenh nih kan zia kan i fiang ti lo. Lih in mi kan hlen tuk hna nak ah kan mah lila zong nih kan i zumh beh tawn. ~~ Dingdi Mang
***************
Hnu hmai thei loin ka buai.
Company pakhat i a ttuan mi upa vialte zaan riah ei i ton ttti nak kan dawr ah an ngei i tuzan a ttuan mi pawl cu kan rian tam, kan ba ko. Relcawk lo tuahawk rian he kan i ciah hna. Bawmh i halnak caan zong kan ngei hna lo. Mah tein tuah lawlaw ah a reng deuh hnga phun khin kanmah le kan tuahawk cio he heh tiah kan tli kan le len hna.
Mahlak ah cun table pakhat ah nu va hna an rak tthu. "Nangmah nih bawm hna mawh, please!" ka hawi nu nih keimah tu a ka rinh. Amah nih a bawmh hna ding table a si nain "A nu pi khi a ziachia tuk hnga mi a lo" a ti.
Poi lo ka ti i an table cun ka hei kal. Nai zarh ah an rak ra i keimah nih ka rak bawmh mi hna an si. "Welcome back!" ka ti i an cah duhmi le an herhmi ka hal hna. Naitan an rat khan cun kan rian tam lo lio a si i an ttin lai zong ah a tangmi an rawl pawl bawm chung ah ka rawn piak hna. Ka rian si lo nain an nu nih "mah a tang mi hi inn ah ttin pi ka duh, bawm ah ka rawn piak" a ka ti. "Bawm kan pek lai i nangmah tein i rawn" tiah tinak nawl kan ngei ko nain tuah awk pipa zong ka ngei lo tiah lungsau tein an ei ciami rawl pawl cu bawm ah ka hei rawn piak hna i bag he ka pek hna.
Tuzan zong naitan an cahmi tthiamtthiam an cah tthan. Ka rian tampi lak ah an duhherh poah tuahpiak khawh ka zuam. Duh hlei an cuai tuk i hna cu an hnok ngai. Nain, ka rian a si mi cu ka tuahawk a si.
Zeitik kar ah caan an liam manh zong theih a si lo. Tuahawk tampi nih tlangthlur in an ka hngah rih ko. Midang table ka bawmh hna lio ah an nu nih a ka auh.
"Atang mi pawl hi bawm ah ka rawn piak" a ka ti.
"Bawm kan pek lai i nangmah tein i rawn mawh."
"YAH? Nnangmah nih rawng."
"Sorry, tuzan cu kan tuahpiak kho lai lo. Na hmuh ko hi. Kan rian tam tuk lio si."
"Sizong ah keimah tuah cu i??? Na tuah kho lo ma?"
Ka lungchung te cun "na hrut ma? na molh ma? thluak ngei lo in ma na nu pawchung in na chuah? na mit ma caw i na hna ma chet?" ka ti.
Nain, "NO, kan tuah piak kho lo. Bawm le check kan put lai ka hngak" ka ti i bawm lak ah ka kal tak.
Ka thin cu a hung ngai. Nain ka tuah piak ah cun minute pahnih hmenh khi a rau hnga si lo. NAIN, ka rian a si lo i tuahawk riandang tamtuk ka ngeih lio caan a si.
OK, tuah piak ko ning ka ti i bawm ah ka rawn piak. Bag ah ka khumh i ka pek. "Ka lawm" aka ti nian ka kaa in zeihmenh chuak kho ti lo. A lawmh nak ding ah kan tuah piak mi a si lo. Mah tuahpiak ding hi ka rian zong a si lo. Nain ka thinlung nuamh ding ah ka tuah piak mi a si. Tuah piak duh lo tak khan um ning law ka thinhung peng rih lai i caan zeimaw zat chung ka lung ah a tat lai. Ka tuah piak lawlawh i ka thluak chung zong in ka chuah chih. Lungdai, thluak thiang!
Midang nih dawtnak thinlung he zanghlei cawi in thil tuah piak mi theihthiam khawh lo hi zeidah a si hnga? Molh ma asi? Hruh dah a si deuh? Thluak nih phanh lo bia dah a si deuh hnga?
***************
Ka kum upat lei sang ka panh bang ka tonmi zong a tam i minung ziaza zong ka theih deuh thlauhmah.
"Atlingmi minung leicung ah kan um lo." Ahman. Nain, nikhat hnu nikhat tthat nak lei ah karhlan i zuam khawh a si. Mi kong ceih a zuam tukmi kan si ah cun duhsah tein kan i tthinh i ahmursau tukmi le bia a duhtuk mi hawile kha kan hrial pah hna hau. "You are what you eat" an ti kha.
Aa uah mi kan si ah cun uahnak nih hruhnak le sunghnak lawng a chuahpi ti hi kan i fian pah a hau. Uah a hmangmi caah cun nun man zong a um lo dah! A cheu nih pawngkam caah tuahpiak khawh mi kan ngei hna lai lo. Asi nian an thang kan that khawh hna i thla kan cam piak khawh hna. Atam deuh thil kan tuahmi hna hi a hman le palh kan i fian buin kan tuah mi an si. Kan minung sinak kan tei lo caan rel cawk lo a si ko lai.
Ahman mi cung ah dir in nun khawh i zuam hna usih!
**********************
