Tuzan zong van ah arfi ceu an chuak ma ka thei lo. Thlapa zong a vang rua lo dah. Muilak ah ka tthu. Hla fung ruk a dih cang. Ka kutdong pawl cu keyboard cung ah cawl loin an um rih. Ka thawpi ka chuah. Tlangkhat ka ttial, ka hrawh. Cun ka ttial tthan..ka hrawh tthan. Ka keyboard ah hin ka hmanbikmi cu "Delete" button a si. Mah "delete" hi um hlah sehlaw catlang tlangkhat hmenh rel dawh in a ttial kho ding ka si lo.
Palhnak le tlamtlin lonak in akhat mi ka sining pawl hi delete nam i athar in i zuam than khawh hei siseh law cu...
Ni caan liam an fawi ning hi. Ka kum upat tluk in zeilei hmenh ah ka thangcho lo. Ka thluak zong a chia chin tluahmah mi a lo. Rian he sianginn kai zong ka harh deuh deuh. Hawi zong cu ticun pei an ttuan pah in an kai ko cu. Zeicah ka thluak nih ma a chei hrim hnga lo. Silo le tangkaa ruang tu ah dah! Ka u pa tuk cang..ka sining kel tein nun peng lai le ka ttih tuk!
26? Ka kum a no rih ko :)
Caan tampi ka ngei rih. Lungdong lo tein i zuam ah cun atlawm bik kum hra ah ma ka tinh mi cu ka phanh ko lai. Ka zumh! Hmmm 36 i tinh mi phanh khawh cu za ngai si :D. 40 hmenh hei si ning law za tuk rih. Tu hmenh kum 40 minung cheukhat he class khat ah fimnak kan cawng tti hna. Kum 40 nih ruahchannak an ngeih rih ah cun zeicah ka ngeih khawh ve lai lo? "It's better to try and fail than to have never tried at all" ti pei si kha.
Aliam cia caan ka raut. Ka minung sinak in ka rak i timh mi le tuah mi lawng te. Pathian nih hruaimi lam zulh i timh lo in ka sialmi lam zulh buin "Bawipa ka tel pi ko" tiah thla ka rak cam. Ka khuakhan ning in thil kal caan a tlawm tuk. Cutik ah Pathian cung ah ka thinhung. Ka thluak chiat ruang ah ka buai i ka sifah ruang ah ka hnabei a rak dong.
Ka rak i fiang lo! Bawipa ttihzah cu fimnak hramthawk bik a si ti kha ka rak ruat lo. A nawlbia zul kho tu si duhnak thinlung ngeih lo in chawva tu ka rak thleihchan deuh. Biapi ah ka rak ruahmi vialte zong a donghnak ah santlai lo thil lawngte ti ka fiang cang.
Suimilam ka zoh. December nih laksawng pakhat he aka don.
Vawlei nih a ka pek khawh lomi ruahchannak a ka petu Bawi Jesuh Khrih ka caah a chuak.
HAPPY SWEET DECEMBER TO YOU ALL!!!
