BELIEVER

Overcomer by Mandisa

Shining Stars like Diamonds

TFIOS by John Green

"You don't get to choose if you get hurt in this world, old man, but you do have some say in who hurts you."~ Augustus

Cauk ka rel mi nih an ka ttah ter caan hi a tam ngai. A donghnak bik ka rel i nguingui thlak in a ka ttah ter tu cauk hi John Green ttial mi "The fault in our stars" a si. A donghnak nih ka lung a ka suk tuk i ka rel dih in saulak te ka ttap. Ni thum li chung cu rian zong ah Hazel Grace le Augustus kong lawng te ka ruat. A tlangval pa Augustus nih a thih tak hnu ah Hazel hi zeidah a lawh hnga ka ti. A zawtnak tah a zual deuh hnga ma? Cancer support group ah tah a kal duh ti hnga ma? Augustus hi nung in Hazel tu rak thih ter sehlaw mah cauk hi ka lung ah cutluk in a tam lai lo. Kapkhat lei cun Hazel tu thih ter ka duh deuh (ka ngai thiam Hazel). A tuanbia tawi nawn in vun langh ter ka duh tuk ko nain Summer ah movie in a chuak ko lai i zoh khawh rak i zuam cio ve uh. Na ruah ning nunnak le dawtnak kong thuk deuh in an hmuh ter lai i na caan an pam ter hrim lai lo. 

Tlang Chokhlei by Joel Ling

Tuni cu ka pum kho lo. Dam lo ruang ah a si lo i tuah awk ka ngeih ruang zong ah a si lo. Thawh ka tolh ruang zong ah a si fawn lo i kal nak motor a tlamtling lo ruang zong ah a si lo :) A ruang cu zahan ah mit phing dih lak in ka ttah ruang ah a si :D :D :D 

Nikum ah ka u nih Pu Joel Ling ttial mi Tlang Chokhlei cauk  kawlram in a ka kuat. Rel lai ka ngaih tuk i ka rel siang fawn lo. A ttha tuk lai ti ka theih tik ah a dih tiang rel lai ka siang lo i nikhat ah tlap hnih, tlap thum lawng in ka rel :) A si nain zahan cu ka sum kho ti lo i cauk lai fang phan lak tiang ka rel. Page 212 tiang a um i page 93 tiang ka rel. Dong lak in rel ka tim ko nain ka thinlung nih zaan khat caah za lak in ngeihchiat nak a tuar tuk ka ti i ka ngol. 

Cauk tam deuh cu kan vun rel dih hnu ah a dongh dan nih kan ngeih a kan chiat ter tawn. Tlangchokhlei cu a laifang ka phanh hlan in a ka ttah ter cang. Tlapkhat hnu tlapkhat ka rel, ka ngeihchiat a zual; Lenku nih a tonmi ka in piak ve ah tuar a har tuk. Chikhat cu cattialtu cung ah ka ing puang :) 

Deilei nazi 3:30 ah ik dih lak in ttah bu he ka cauk cu chantling tang ah ka nawh. Lai ca in ka rel mi a voikhatnak bik novel a si. Zeitik hmenh ah ka philh kho lai lo. Sumkhal in denmi thingthei bang ka thinlung cu cip dihlak in ngeihchiatnak nih a den. Pu Joel Ling he a leng ah hei i tong u sih law "U El, Lenku cung ah na tta-ya lo. Na ton ter mi harnak le ngeihchiatnak vialte hi minung pakhat nih kum tlawm te chung ah ton dih ding ah cun Lenku cung ah na luantuk lo ma?" tiah ka hal men lai :)

Zanlei pumh dih in Saya Chan te an kan leng. "Ziah tuni na pumh lo?" a ka ti i "Ka lufak pah i si." tiah ka leh. Tin lai ah kan inn chungkhar ca'h thla a kan cam piak i ka lufah a damnak hnga ca zong a telh chih :D Ka lung thli te cun "U El, nang mah ruang ah" ka ti :D  "Lungput" le "I Tonnak" timi cauk in Pu Joel Ling cattial hi ka rak uar tuk. "Lungput"a ttialmi hrim hi cu tam tuk te rel kaa nolh cang. "I Tonnak" zong a ttha tuk. Bia hal a thiam i a ruahnak a sang. Hal awk zong a thei cawk ti awk in a khuahmuh kau. A tu ah novel ttha tak a vun ttial i ka rel khawh ve caah ka lawm tuk. Muko magazine rel ka duh tuk nain Dallas lei ah an zuar ka thei lo. Tlawm tuk lawng a phanh i cawk awk a taan lo bia ma asi a phanh khawh lo dik a si deuh. Laimi nih Pu Joel Ling bantuk catthial thiam pakhat kan i ngeih hi cu ka uar kho pi tuk!!!!!!!!!!

Tlang Chokhlei peh  lai kaa ngaih. Nain tuzan cu mit kuh vuai tein ih ka hau. Mit phin ruang ah rian kal kho lo in ka um sual lai. Computer screen nih ka mit a fah ter chin ko nain ka inn ka vun hlam taa :)