Title lak ah tax office ka phan. Parking a lawng mi ka kawlnak ah minute pahra deng cu ka rau. Mah tluk ko cun mi an tam hnga ka ti. Parking hmenh mahtluk a har ah hin cun ttan-si (waiting line) sau tak dir ka hauh lai ka fiang cia. Office he a hlat ngai nak lawng ah parking pakhat te a rak lawng. Ke in sau lak kal a hau nain nikhua a ttha, thli tu a hrang tuk lo i hla ngeih pah in zung chung ka phanh manh ka thei lo. "Information center" aa tinak ah ka kal i ka tuah duh mi kong ka hal. Mirang tar nu te nih a ka bawmh i ka tuah duh mi he a pehtlai lomi kong zong heh tiah a ka ceih pi i caan a la ngai. "Mah form hi hei fill up law na hnu lei i line ah khin va ttan si ve ko. Na insurance na put ma?" a ka ti. A form cu ka zoh i "na ka pek mi form hi inn in ka print cia i ka fill up dih cang. Insurance bal ka motor chung ah a um. Insurance lo in poi lai ma?" ka ti. "Na va lak a hau lai. Cun, na form he khan mah ka khin va ttan si te" a ka ti. Parking lot ah va kir tthan ka zuam lo tuk ning cu. Asi nain a hauh ve mi cu ka ti i ka motor chung ah ka insurance cu ka va lak.
Ka ruahnak bantuk si lo in sau ka hngak lo. Mirang pa nih a ka bawmh colh. Tukttek a herh mi a ka hal, ka leh, min ka thut...i " mah zat cu a dih lai. Cash or credit?" a ka ti. "Yah ka insurance zong na ka hal lo, na herh lo ma?" tiah ka hal. "Nah, na ngei ko tiah kan zumh. I don't need it." a ka ti. Ka lung chung te cun "Damn!!! Grandma!!!" ka vun ti ta manh rua :)
Rian pakhat ka lim. Kar zang tak in parking lei ah ka kal. Ka motor pawng te ka vun phanh bak ah "Bomm" tiah thawngthang pakhat ka theih. Ka mer i ka zoh ah cun SUV motor a mawng mi nu nih a pawng i a dir mi motor a hnu lei a rak ttheih (hit). Ka zoh ko. A pawng passenger seat ah kum 12 hrawng ngakchia pa te a tthu i a mirh bu in a ka zoh. An dir lai i an hit mi motor ngeitu caah note te tel an chiah tak men ko lai tiah ka motor chung cun ka lut. Ka mer tthan i thlalangawng in ka hei zoh ah cun lo diam in lam lei ah a mongh ai. An motor plate number bal ka by heart manh i an van a chia. Duhsah tein mawngh buin an hit mi motor cu ka zoh. Fak tuk in an hit i a hnu lei cu a dep tthup ko.
Ka motor ka dir ter i khua ka ruat. Police ka auh ah ma a tthat lai? Motor cung i ngakchia pa te kha ka mitthlam ah a cuang. Ka lung ttha lo. Zeibantuk nu le nih dah an fa le khi "mah ti hin mi na hit hna zong ah tlik tak ko" tiah an cawn piak hna hnga? Ka phone ka lak 911 ka dail. Minute pahnih a rau lo. Police a rak phan.
"You are very welcome. I am glad I could help!"
*******
UTA ka kai hramthawk bik semester ah mi nih ka motor an rak ka hit bal ve. Sianginn parking lot in ka chuak i lam cung ka phanh ah a si i a ka hit tu nih lo diam a ka tlik tak. A lang hlat in a rak hmu mi pa nih a ka hit tu pa motor cu a va dawi i a motor plate number a rak ka pek. Police an ka auh piak i witnesses ah minung pahnih nih an rak ka dir pi. A ka hit tu pa zong cu UTA siang ngakchia a rak si ve. Ka van a chia. A pa nih mail a rak ka kuat i "ka fapa motor nih an hit ko nain a mawng tu kha ka fa pa a si lo. A hawipa nih a mawngh. Mah caah kan insurance kan in pe kho lo." a rak ka ti. Ca leh tthan na duh ah cun a ti i an address a telh chih.
Google earth in an address ka zoh. An inn a that ning hi. Mirum an si cu aa thei ko. Nain an fapa bal cu minung pakhat nih a ngeih ding thinlung le khuaruah khawh nak an cawk piak kho lo hi ta ka ti. An motor plate number ka ngei, witnesses ka ngei. Nain ka motor remh nak caah an rak ka cham duh lo i insurance zong nih zei te an tuah kho lo. Police dept kal, insurance com. chawnh le Workshop i motor va up, rental motor mawngh cun, keimah ka insurance hmang in a dih mi liam ....ka ruah tthan ah ka ka ingphuang tthan lei. Achel ah khua ka ruat i ...Nikhat hawng caan pek in kan sianginn vel i a ka hit tu pa motor va kawl hna ka duh. Cun baseball bat in a motor thlalang vialte khuai piak dih ve khi :)
Sau cu a rau nain ka dih mi vialte an ka liamh tthan. Never stop fighting for what is right.
