August thla phanh lai ka rak i ngaih tuknak a ruang pahnih a um. Ka chuahthla a si i August 1st in ka nuam tuk cang. Kum upat lei sang ka panh thluahmah nain ka ruahnak ahme tthiam rih. Ka lung a cang ngai tiah ka uar tawn. Lung tthawn le lung fim tu ka herhbau tuk.
Cun, August thla phanh lai ka ngaihnak cu ka dawt tukmi ka hawinu Venus nih kan tlawng lai a ka ti caah a si fawn. Rian le Sianginn he a buai tukmi a si tik ah 100% in cun ka zum ngam lo. Ruah lo pi'n a rak ka tlawng tak. Ka nuamh tuk ning hi!!!
Hawi tampi ka ngei lo. Nain, Pathian nih hawittha a ka pek. " I rather have 4 quarters than 100 pennies" timi kha ka hnathla ngai ve. Hawi tampi ngeihnak in hawittha ngeih hi a sunglawi deuh hringhran ko.
Dallas chung hmenh vah awk ah tthatthi in motor a mawng kho lo mi ka si. Mah ah cun Venus he Houston tlawn kan i tim. Joel Osteen biakinn ah va pumh khawh kan duh nak hi a sau ngai cang. Tueday afternoon ah kan i thawh i zanlei 4:15 ah Houston kan phan. Space Center ah kan lan colh i 5:10pm ah kan va phan.
Cun, zaan ihnak hotel kawl kan i thawh i saulak te kan rau. Athaizing cu Mall ah kan kal. Pumhnak 7:30pm ah an thawk ding a si caah 5:00pm ah ttin khawh kan i zuam nain lam kan tlau i 6:00pm deng ah kan umnak hotel kan va phan.
Pumh kal lai kan i ngaih ning hi a zual. Kan umnak le an biakinn aa naih te i tuan ah kan va phan. Houston khualaifang ah an biakinn cu a ngan khawh ning le a tthat ning hi!!!!!
US ka phakkaa i ka rak i pumhnak biakinn kha a tucu cheu nga ah aa tthen cang. Kum 7 chung ah mu. Mah ah cun hitluk members vialte hi lungnge tein zeitin dah an i pumh khawh hnga ka ti? An parking lot a kauh ning le an biakinn rianttuantu pawl an fel tuk hna ning cu.
Thawngtthabia ngeih hlan in an mithmai le an mi chawnhbiak dan hmuhnak in thazang tamtuk kan i lak khawh rua dah ka ti. Tuan ah kan phanh caah tthutnak ttha te kan ting i kan i lunghmuih tuk. Praise and Worship in caan an thawk i hla hruaitu pawl an aw a tthat ning cu. Hla fungthumnak kan sak lio ah minu pakhat nih a rak kan auh i hmaibik tlangthumnak ah tthutnak a um. Nan duh lai ma? rak ka zul uh a kan ti. Venus he kan i lawmh ning cu!!!
Nithum zaan a si tik ah a pummi cutluk in an tam lai tiah kan rak ruat lo nain a pum mi an tam tuk. Mirang, Mexican, Minak le Asian he miphung kip ka i cawh dih. Minung thong zeizah ko dah kan si hnga aww ka ti. Thlacam lio ah hnu lei her in ka hei bih pah hna. Pumh dih tik ah tah mah vialte minung hi zeitin dah kan chuah hna hnga? Biakinn hmete hmenh ah kan i eng pah tawn hna, wedding kal caan zong khin minung zakhat zahnih te kan si ko nain kan i nam pah tawn hna khi mu :) Pumh a dih i azei nam le nam lo cu dai tein atlang tein an chuak hna i zeitik kar ah minung rel cawk lo vialte an chuah dih manh hmenh hmuh a si lo. Venus le kei cu a hmaibik stage pawng tak ah kan tthut caah hmanthlak tak nak ah a tlamtling ngai i hman kan i thlak dih tik ah cun biakinn chung ah mi tlawmte lawng an rak tang cang :)
Mah zaan cu Pastor Nick Nelson nih phung a chim i misur hang zong Paul Osteen nih a kan pek. "No String Attached" timi tlangtar in thawngtthabia a ka chimh i thazang tam tuk kan i lak. A bible catlang cu Korin khuathnihnak chung in a si.
A ka lehnak cu, "Ka vel hi na caah a za ko, zeicahtiah ka tthawnnak cu derthawmnak ah hin a lang," ti a si. Cucaah cun Khrih tthawnnak nih a ka huhphenh ti kha ka hngakh nakhnga, ka derthawmnak ah hin lunglawm tein kaa porhlaw cang. Ka derthawmnak ah siseh, nihsawhnak le harnak le hremnak le temhinnak ka hmuhmi ah siseh, Khrih ruang ah kaa lawm ko; zeicahtiah ka derthawm tikah hin ka tthawn a rak si." 2Korin 12:9-10
Thawng ttha bia nih thazang tamtuk a ka pek. Ka nunnak ah hin caan tam deuh cun ka herhbaunak ruang ah ka lungre thei i ka buai tawn. Ka hmuhmi thlachuahnak vialte ruat lo in zeidang kong ah lungsivang in ka um tawn. Rian ttuan khawhnak thazang ka ngeih mi cung ah lawmh lo in sianginn full time kai khawh lo ruang ah ka ngeihchia tawn.
Hawidang nih motor ttha le inn tha he an chung le an zoh khenh khawhmi hna ka hmuh caan ah ka lung dong tawn. Ngeihchiatnak le zawtfahnak pipa um lo in ka chungle nuam le ngandam tein an nun khawh mi tu cu ka philh tawn. Tial awk ah a tam tuk lai. Bawipa na vel hi ka caah a za hrim ko!!!
Kan kalnak road trip ah na kan tel pi caah ka lawm Bawipa!
Your Grace is more than enough for me Lord!!!
Ka dawtmi ka hawi Venus cung ah ka lawm tuk fawn.
You are a blessing to me <3
