Give Thanks

Relcawk lo lawmhnak in akhat mi nunnak na ka pek caah Bawipa ka lawm! 

Tuzing cu tuan ah ka hlau. Ka u le ka tta le cu an tho rih hna lo. Tubantuk in inn ah kan za tein kan tlin hi a um tuk bal lo. Ka nuam ngai. Zei pipa tuah kan i tim hna lo. Nikum Thanksgiving cu rawl kan chuang hna, hmunkhat te ah ka tta le family he caan kan hmang hna nain...tukum cu... zeiti awk ttha. Bawipa ka lawm tthiam ko. Na vel hi ka caah a za ko.

Nai ah zumlo tu ka hawi le nih "nan biakinn ah kan kal pi ve" an ka i. Ka lawm ngai. Nain kan holh in si i zeihmenh nan thei kho lai lo ka ti hna. December thla hrawng tu ah Joel Osteen biakinn ah kan kal pi te hna lai ka ti hna i an i lawm tuk. A lak a si hrim lai lo. Nan nunnak ah atthatnak lei in chapnak pakhat khat cu nan i lak khawh hrim lai tiah bia ka kamh hna :) Mirang holh ttha tein thiam ning law cu ka cawnpiak pah lengmang hna hnga ka ti. Kaa in chimnak in tuahsernak in langh ter khawh deuh a si ko nian ka minung sinak ka tei lo caan a tam tuk i hmaikhah hmenh si tawn lo :P

Bawipa hawittha na ka pek caah ka lawm. Khua ka ruah tawn ah hin hawittha ka tlaihchan tuk ruang ah ma tlangval ka ngeih khawh hnga lo ka ti? An hmet lio i ka rak puak len mi hna pawl hmenh va an ngei cang hna. Kei hi tutiang ton lo in ka tar tluahmah cang :D Facebook hna i ser a hau men lai tiah kaa capo pah tawn. Mah lo cun tonnak pei a um lo cu ...hmmm zingkasik zeikhua ko hen ka ruah!

Tuni cu mah le duh ning in caan hman cio a si lai dah. Ka u le chungkhar cu movie zoh an i tim i ka tta nih kal nak ka ngei ve ti a si. Sianginn ka hawi le he cazoh ka thawh ve lai. Cazoh i thawh i movie zung va phanh khi lol Nikhua a tthat cun cazoh zuam a si bak lo. Camipuai nih naih deuh, vah nih duh deuh..nunnak hi a tawi.
Nuam in hman ding a si ko hei ti i va vah chih khi...Bawi Mang Lian ttialmi "Iteinak" capar ka lung ah a hung chuak..

Well, tuah awk vairang khuazat nih an ka hngah! Coffee hraihnih ka lim cang. Tho ning!

A Beautiful Day

Bawipa aa dawh tukmi nithar phanh khawhnak caan ttha na ka pek tthan caah ka lawm!

Tuni cu 10:30am ah ka tho i ka mihkuh a vuai ngai. Ka ihnak khan puanzar pit tein ka khar lo i nitlang nih a ka ceuh. Inka ka on i leng ka cuan. A dawh tuk ning cu. Thinghnah hring dildal thlitu he ruang in an lam. A kik lo i a lin fawn lo. Van a thiang. Motor thawng pang a dai i thinghnah hnor thawng din tein theih khawh a si.  Inn hmai pangpar lak ah saveh hmete te an tli le len hna. Oh a dawh tuk hringhran tuni nikhua cu....

Coffee ka ding. Inn hnulei ka cuan. Inn hnulei cu thinghnah ro a ttilmi in a khat ko. Mah thingkung pi hi khuasik phanh fa tin ttilh hram a thawk peng. Thingkung dang nih hring dildel in khuasik an don caan ah annih cu thih hram a thawk. Charcawk lo in thlitu nih a tthilh. Coka i coffee din pah in lenglei khuacuanh pah nih ka lung aka nuamh ter tuk. Nunnak ngei lomi thingkung ramkung pawl zong  nih khua an ka ruah ter tawn. 

Naite laitlang ah car accident in ka hawipa nih a kan liam tak. Tangcheu in tangli tiang kan rak kai tti hna. Kawlram ah ka tthial i kan i hmu kho ti hna lo. Nain ka mithlam ah a cuang kho peng rih. Upat hnu in kan i hmu ti bal lo nain tangli kan kai lio muisam te kha ka philh kho rih lo. Ka ngeih a chia tuk. Kum no tein a kan liam tak. Tangtak mi a nu le a chungkhar pawl an ngeihchiat lai ning ka ruah piak hna ah ka celh lo. Pathian nih tuar khawhnak thinlung pe hram hnaseh tiah thla ka cam piak hna!

Minung kan nunnak hi a va tawi khawh ve ning! Cun, uk khawh a va si lo ning! Thaizing nih zeidah arat pi lai zong chim khawh a si lo! Thaizing cu chim lo nihin ah zeidah kan can lai zong zeihmenh a fiang lo. Kan minung sinak in khua cu kan khang. Caan tampi cu kan minung sinak kan i bochan. Tangkaa ngei deuh mi lawng minung ah kan rel hna. Kan mah kong ah buai lo in pawngkam kong ah kan i thlak. "Ka mi tei le caw ek" tibang thazang dermi pawl cung ah duh in bia kan chim i an ngeih kan chiat ter hna. Kan nunnak a tawi ning hi i fiang hna u sih law cu kan ziaza hi kan i tthinh kho deuh ngai hna lai...

Maw Bawipa ka sualnak cu zeitluk hmanh in ngan seh law na vel ruang ah ka ngaithiam ko....

A Cold-hearted Day

Sualnak ngei lomi nikhua cung ah ka thin hung. Akih tuknak ah ka keng zong a fak dih i zei tuah hmenh ka zuam lo. Khuasik thla phanh lai ka ttih ning le camipuai dih lai kaa ngaih ning aa tluk! Zanlei nazi 4:15 lawng a si rih nain khuamui deng mi a lo. Dong loin ruah siamsiam tein athla, thli a hrang i a kih zual. Angki that zeizah ko dik ka hruk...nain ka khua a lum kho bal lo. 

Tuni cu Library ah cazoh ka thawh. Zarhpini i biakinn phanh lo in cazoh thawh cu Pathian hmai ka khap lo ngai. Library i quiet room ah minung pakhat lawng a rak um. Ka tthut tawnnak ah a rak tthu lo i ka lawm ngai. Thlalangawng kam ah ka tthu i leng lei ka hei cuan pah. Ka bag pack ka kau...ka herhmi thilri ka hun chuah hna i ka herhbikmi calculator bal ka hmu lo. Ka u ka text, inn ah ka philh ta ma tiah? Ka hmu lo a ti. Ka lo ko! Inn ah ka philh tak lo a si cun totoring center ah ka philh tak diam a fiang. A tlau diam cang lai! Tuni zoh ka timhmi ca cu Calculator lo cun zeihmenh tuah khawh a si lo ding khi...;( Bawipa nih dan ka tat rua ka ti. Cawk tthan ah cun a tlawm bik $125 cu ka dih lai. Bawipa nangmah thangtthatnak phanh duh lo'n thil dang ka tuah ruang ah ka ngai thiam ko. Ka Calculator te ka tutor hawi le nih rak ka fim piak hram hna seh! Thla ka cam. Phuhrung bu tein...Please Bawipa.

Ka phone ka silence lai ka vun ti ah rian hawi le sin in msg a lut. Nepalese pawl an si i an ziattha tuk. Laimi he kan nuning a khat pah ngai in ka hmuh. Nain, mi thangchiat bal an hmang lo. Cun, mikong ah an i thlak fawn lo ;) Rian ka ttuannak lawng ah si lo in sianginn zong ah Nepalese hawi tam ngai ka ngei. Tam deuh hi pa an si. Apoinak cu ka class ah nu kan tam lo. Zingka ka class pakhat cun nu hi panga lawng kan si. Test kan phit fate a hnubik a tangmi hi nu kan si fawn :P Pa hi an thluak ma a rak tthat khun ko hnga ka ti tawn. Nain, double check an zuam lo caah an reng khun i si lai tiah atthat nak lei in thazang ka pe tthan :D

Caan tampi khua ka ruat tawn. Ramdang hawile he kan um kal tti le rian kan ttuan tti ah hin keimah le keimah ka nuning ka ka zoh tthan ah ka tha um lo ngai. Zumtu khrihfa ka si ka ti. Ei lai ah thla ka cam. Ka hawile hmai a si zong ah ka cam ta ko. Zarhpi ni ah biakinn ka kal (zarh fa te ngawt). Pumh a duh lai tiah rianttuantu an herh caan hmenh ah ttuan an ka fial lo. Asi nain, ka umtu ziaza kaa zoh tthan tik ah zumtu pakhat nunning in ka nun lo caan a tam tuk. Zumlo tu ka hawi le cu an lung a sau, mi zawn an ruat, hawi palhnak sau an i cinken lo, thleidannak thinlung an ngei fawn lo i minih zeiti an ti hna poah ah leh lo tein an um ko. Kei cu an ka ti men ah ahlawnh in kaa hlawnh i hrial ka timh hna :< Sumlo in ka vun ti dih hna hnu ah khin ka lungttha than lo i ka nawl tthan tawn hna. Caan tampi cu ka hawile hmai ah Pathian mithmai ka bit ter ngai. Pathian sin ah thla ka cam tawn; "Bawipa ka zulh awk hnga lam ka hmuhsak, ka cawnpiak law lungthin ka cheu ko" tiah...

Laimi hawile blog pawl ka len lonak a sau ngai cang i ngaih an um tuk. Mino tete an si hna nain an ruahnak amak kho tuk. Thil an thei i chan he tlang in an kal kho. News tthattha le ideas ttha pawl in an blogs hi a khat peng. Ka uar kho tuk hna. Zeitin dah mahtluk in thil an theih khawh hnga? Cun ziah mahtluk in laica an thiam hnga? Jealous tuk tawn :D and so proud of them :D

I MISS YOU SO MUCH!

Movie Night

"Gone Girl" hi cauk in ka rak rel bal i Movie in an chuah lai ti ka theih lio ah zoh lai ka rak i ngeih tuk. Caan nih a ka pe lo i tuni lawng ah ka va zoh khawh. Cauk in ka rel lio ah a donghnak nih ka lung arak ka tong lo tuk. Ka rel sual tiah ka thinhung pah fawn. Director David Fincher a si ruang ah zohlai ka ngeih nak zong hi a si. A donghdan nih ka lung aka tong lo tuk i movie tel in ka lungsak deuh hrim lai ti zumhnak he ka zoh. Ka hman ngai :) Ka lung si tuk. Director pa a thiam tuk. Relcia mi tuanbia a si ko nain zeidah cang lai tiah theih duhnak thinlung in ahramthawk in dongh tiang a ka phanh pi. 

"The fault in our star" timi cauk zong movie in a chuak diam cang nain ka va zoh lo. Ik dih lak in a rak ka ttah tertu cauk pakhat a si ve. A donghnak hrim nih ka lung a rak ka suk tuk i deilei tiang ka rak it kho lo;( mah ruang ah movie in an chuah mi ka va zoh lonak zong cu a si. Cauk tha tuk mi poah movie in a chuah tik ah careltu kan lung akan ton caan a tlawm ngai :D 

"The Silent Wife" hi Gone Girl he akhat ngai. Movie in 2015 ah an chuah ve lai i ngeih a um ko. Mirang cauk hi rel ka harh ngai ngai. Ka hawi dang nih nihnih thum ah an lim mi khi kei cu sau lak te ka rau. Ka theih lomi words an tamtuk i dictionary zong zoh cawk a si tawn lo. Hlan ah cun ka u nih kawl magazine ke novel pawl a ka kuat mi ka rel tawn nain mirang ca tel ka thiam deuh lai tiah mirang cauk pawl rel ka zuam deuh cang. Ka chap pah ngai ko nain ka harh ngai te. 

Mirang novel cauk a dih tiang in ka rak rel hmasabik hi "A thousand splendid suns" by Khaled Hosseini a si. Ka hawipa nih a rak ka introduce mi cauk a si i atu tiang a cung ah ka lawm tuk. Cun mah cattialtu pa ttialmi tthiamtthiam "and the mountains echoed" timi nai te ah library ah ka hlan i ka rel lio a si. Ta far chungkhar dawtnak kong a si. Ka rel kaa te lawng si rih i zeidah a ra lai ti theihduh nak nih a ka uk tluk in  rel khawhnak caan nih a ka pe rih lo ;( 

Tulio ka rel mi lak ah thazang a ka pe bik le ka nunchan hi zeidah a si ti aka fianter tu cauk, ka hawile vailte zong rel ter kan duh ve mi hna cauk cu "The Purpose Driven Life; What on earth am I here for" by Rick Warren hi a si. Rel khawh rak i zuam ve te!