Thaizing sianginn ah
presentation pek ding ka si i ka ruah ah ka thin duk..duk in tor. Mi tampi hmai
dir i biachim cu ka thiam lo bikmi pakhat ah aa tel mi a si. Minute 4-6 rauh
lawng a si ko lai nain ka thin pang cia tuk, ka ttih tuk. Chim awk philh dih in
ka tlau sual cun ka thi lai. Kan sayamah nu hi a zia a ttha tuk mi a si. Ca a
chimhnak kum 28 leng a si cang. Zumtu a si i a thinlung a nem, a inn chungkhar
kong a kan chimh pah tawn. Akum a upa ngai cang ko nain a thinlung a no tuk, a
liklek tuk rih, nu dawh pakhat a si. A fimnak a sang i a khuaruah a tthuk.
Nain, mi toidor a si ti hi a biachim le a umtu in theih khawh a si. Class thawk
caan ah a rak ton bal mi kong tuanbia tawi bantuk tein a kan chimh. Cawn awk, i
lak awk i nunpi awk tampi a kan pek. Kan ngakchiat lio i saya ttha nih ca a kan
chimh mi tutiang kan philh khawh lomi bantuk khi a si. Ka nunnak ah ka
chingchiah peng lai ka zumh. Kan cawn hngami subject kong he pehtlai lawng in
si lo'n humanity, politics, society in pop music kong tiang a tlinh dih.
Tuni cu class ka ngei lo i
library ah thaizing presentation ca timhtuah ding in ka ra. Khuazei in ka thawk
lai ka thei lo, ka thin phan lawng ka theih. Tuhmenh ah mahtluk in ka thinpang
i ka ttih mi hi zei tin ka tuah lai...khua ka ruat. Bible ca vun rel ta ning ka
ti..ka phone ka lak. Ka phone ah "Inspirations" timi app ka ngei. Ka
kau i a rak chuakmi bible verse nih a ka mirh ter, ka lu kaa lei, ka thawpi ka
chuah...ka zumhnak a der tuk rih ning hi ka ti..
"Can any one of you by
worrying add a single hour to your life?" timi Matthai chung ah kan hmuh
mi kha a si.
