DAWTNAK-LOVE

Kumthar hramthawk a si i rian ah tuah awk pipa kan ngei hna lo. Caan tam deuh cu computer hmang in kan duh poah kan rel hna. Ka zuam cawk lo i building dang ah ka va i chok tawn. Ka hmuhmi poah bia ka ruah hna. An um har tuk cio ve hna i heh tiah bia sawng kan tlorh hna. Zeitin dah Christmas na hman hei ti..new year plan hei ti pawl kan i ceih hna. An family pawl hmanthalk an ka piah. An min an ka chimh. Ka cinken cawk lo :) Kan i chawn tuk bal lomi minu zong he sau ngai kan i chawn. Mexico in a ra mi a si. President thar a kai lai mi kong zong sau ngai kan i ruah. New year resolution kong lei ah kan i mer i a ka ti mi cu "kei ka new year resolution cu family he i naih deuh in le daw tein um a si" a ka ti. 

 "Aww macu a tha tuk cu ta " ka ti. Family members tampi a ngeimi chungkhar an si. Ruah lo pin Chirstmas lai ah an tu pa te nih a thih tak hna. An chung ah thih loh an ton hmasa bik mi khan a si i an ngeihchiat a zual khun. A ka ti mi cu, hikaa ram cu rianttuannak ram a si kan ti i rian kong lawng te ah heh tiah kan buai. Pakhat le pakhat caan kan i pe kho hna lo. Chitkhat te phone i auh i na dam ma? kan ngai tuk! Kan dawt tuk ! i tinak caan zong kan ngei hna lo. Kan thih kan loh hnu lawng ah kan i ttah hna i zeisan hmenh atlai ti lo. Nun lio ah dawte le rem tein khuasak tti khawh hi a rak bia pi tuk. Mah caah cun tukum thawk cun zeitluk in ka rian a tam zong ah ka dawtmi ka chungkhar cingla rualchan pawl caah caan ka pe deuh cang lai, tiah a ka ti. 

 

A chimmi ka hnatla tuk ve. Nifate rian ka tuan.. leiba le pawcawmnak caah tangkaa kawl peng a hau. Khuaruahmi a tam. Lungtha a ba. Thildang caah caan pek nak caan a tlawm. Nain ni a hun liam, caan a hun dih tak tik cun a biapi bikmi cu chungkhar pawngkam he daw tein um,  chawnhbiak le zeitluk in dah kan i dawt timi i theih ter hi a rak si ko. 

Minung kan nunnak a tawi ning hi, theih lo kar ah a liam kho dih mi lawngte kan si. Kan thihtik ah kan i kalpi khawhmi thil zeihmenh a um lo. Nain kan pawngkam caah ro sungbik pakhat bal kan chiahtak khawh hna. Cucu DAWTNAK a si tiah ka zumh!!!

I CRIED

Dam tein kumthar kan phan than cang. Bawipa atha a zungzal in. Kan nunnak hi zeitluk in dah a tawi ti hi kan fianter law cuti cun kan fim deuh hnga tiah Bible nih a ti. Kan nunnak a tawi ning le caan liam a fawi ning! Kumkhat hnu kumkhat kan upa thluahmah, kan hmuhton mi thil an tam, kan ruahnak a thleng, kan caah a biapi i kan chiah mi thil zong an i dang thluah mah hna. Kumhlun kong ka ruah ah Pathian thangthat lo in ka um kho lo. Bawipa a thatuk. Sianginn kainak ah lam a ka hruai, rian tuannak ah a ka um pi. Ka minung sinak nih a ruahkhawh leng in thlachuahnak a ka pek. Joel nih a ti peng bantuk in Pathian cu zeizong vialte tuah khotu a si. Minung nih kan ruahkhawh lo leng le, kan hmuhkhawh lo leng in thilti khotu a si. Caan tampi khua ka ruat tawn nain ka ruahnak nih a phan kho lo_ _ _ Bawipa dawtnak a ngan ning hi!

Ngandam nak na ka pek caah ka lawm.

Thlachuah na ka pek caah ka lawm. 

Na ka umpi peng caah ka lawm. 

Kan philh caan le na duh ning in ka nun lo caan zong ah na ka ven caah ka lawm.

Hal hau lo in ka caah na tuahmi thil vialte caah ka lawm.

Nikhat hnu nikhat fim na ka chimh caah ka lawm.

Ka nunnak ah na ka pek mi ka pawngkam minung pawl caah ka lawm.

In khawh lo tiangin hneksaknak na ka pek lo caah ka lawm.

Ka caah ah na tuah ciami thil vialte ruang ah ka lawm i hmailei ah na tuah lai mi thil caah zong ah ka lawm.

Bawipa nangmah zumtu ka si mi cung ah ka lawm khun.

Na dawtnak ka ruah fa tin ka lawmhnak mithli a luang Bawipa!!!